Ua faalēaogā e le Faamasinoga Sili le tagi tau palota mai Falealili No.2 ona ua le tuu atu se talosaga aloaia o moliaga faatosina solitulafono o le palota laititi a lea itumalo e tusa ai o aiaiga o le tulafono o faiga palota. 

O lona uiga o le talosaga lea na faaulu e toe faaui ai tua le tagi a Leleimalefaga Neemia ua faaleaoga e mafua i le lē tausisia o lea aiaiga faaletulafono.

Ua na’o le tagi tau palota a Sagaga No.2 ua talia le toe faaui i tua ina ua faamalieina le faamasinoga i aiaiga ma tuutuuga o tulafono faigapalota na faaulu atu iai le talosaga e toe ave i tua. 

Ae faapea foi le talosaga a le itu na tuuaia na talosaga ai le toe faaui ai tua o moliaga faasaga i le itu tagi ma o le a lipotia atu ia vaega uma i le Fofoga Fetalai o le Palemene.

E manino mai i faaiuga o nei mataupu e lua ua na’o le tasi le tagi tau palota na faaulu ua na’o le mataupu mai Sagaga No.2. 

Ua faatumauina ai nei la le sui faipule filifilia o lea itumalo faapalota le tofa Maulolo Tavita Amosa o le sui lagolago o le vaega faaupufai o le HRPP. Ma le sui faipule mo Falealili No.2 ia Maiava Fuimaono Tito mai le vaega faaupufai a le FAST.