O le asō, lea na faataunuu ai feiloaiga a le vaega faaupufai a le Labour, mai na feiloaiga o loo tumau pea ona avea Chris Hipkins ma taitai o le patī, ma le tamaitai o Carmel Sepuloni o le sui taitai.
O le feiloaiga muamua sa mātele i le faafetai ma faamavae atu i sui o le patī ua lei toe foi mai ina ua mavae le faigāpalota lautele a le atunuu, ma o le fonotaga foi lena na faasilasila ai e se tasi o sui faipule pito umi i totonu o le vaega faaupufai ma le Palemene, o ia foi sa avea muamua ma taitai o le Labour, le susuga ia Andrew Little, lona faamavae mai polokiki.
O le feiloaiga lona lua, sa tele ina faatalanoa ai e sui o le patī ua toe manumalo mai faapea o latou sui fou, nisi o mataupu o le a agai i ai le silasila a le patī mo le tapenaina o le isi a latou laasaga o le a faatino mo le agai i luma, aemaise foi le toe silasila i nisi vaega na faaletonu ai le latou tapenaga i le faigāpalota lea ua iu ai ia malolo.
Na saunoa Hipkins i le aufaasalalau, e lei lāvea i na feiloaiga uma le mataupu i le toe faamautuina o le taitai o le vaega faaupufai, lona uiga o lea lava e avea o ia ma taitai seia oo ina iai se isi suiga.
O tulafono lava a le vaega faaupufai o le Labour, i totonu o le tolu masina talu mai ona uma se faigāpalota ua malolo ai le vaega faaupufai, o le a faia ai loa se toe sailiga o se latou taitai.
Faailoa e Hipkins, o le a faatali le patī se’i mae’a lelei ona fai le faitauga faaiu o le faigāpalota ma ua faatulaga uma le atoaga o le patī a le Labour e tapena ai mo le isi faigāpalota, ona fai loa lea o le palota e saili ai lo latou taitai.
Faailoa e Hipkins lona naunautaiga atoa e lagolago malosi i le tulai mai o le Labour e avea ma vega e agaia le faigamalo poo le Itu Agai, ma o le a ave atoa i ai lana finau mo lena fuafuaga.
I le feiloaiga a le aufaasalalau ma le taitai ma le sui taitai, Hipkins ma Sepuloni, na fesiligia e le aufaasalalau Hipkins pe lei mafaufau ua tatau ona faamavae mai le avea ma taitai, ae na tali Hipkins e leai, auā e lei leva ona tulai uma mai laua ma Sepuloni i tofiga taitai o loo iai nei.
Saunoa Hipkins, e tele lava vaega o latou polisi poo faiga faavae o le a toe silasila i ai le vaega e toe sui pe toe faaleleia atili e tapena ai mo le isi faigāpalota i le 2026, aemaise vaega e iai lo latou talitonuga o inā lea na alu ese ai le lagolago a le atunuu mai le latou vaega faaupufai.
