Ua toe faailoa e Unasa Iuni Sapolu le loia o loo tula’i mo le tamaitai o Papalii Sia Figiel o loo molia i ni solitulafono se ono e aofia ai le fasioti tagata faamoemoeina, ua faaauau pea ona tetee lē o loo molia, ma ua toe talosaga e tatala i tua i ni aiaiga.
Sa faailoa muamua e le loia i le valaauga talu ai, ua iai se lagona o lē ua molia e suia lana tali i nisi o moliaga ma ua lē faaauauina le talosaga e tatala i tua i ni aiaiga.
Peitai ina ua toe tula’i Papalii Sia Figiel i le Faamasinoga Maualuga i le Aso Gafua o lenei vaiaso, na faailoa e lana loia e tumau pea le tetee i moliaga uma e ono a leoleo.
O le masina o Setema o le a suesueina ai le talosaga mo le tatala i tua o lē ua molia, lea sa amata nofo taofia i le vaaiga a leoleo i le masina o Me.
