O le faamuta ai o le toe avea ma sui aloa’ia o le vaega faaupufai o le Faatuatua i le Atua Samoa ua Tasi, o le Palemia ma minisita e to’alima o le Kapeneta, ma le tulaga o le avea pea ma sui aloa’ia o lea pati faaupufai o isi minisita e to’aiva o le Kapeneta e lē o aveesea ai folafolaga na finau ai le vaega faaupufai latou te faatino pe a tula’i i le pulega o le malo.
Ua faaalia e le ta’ita’ifono ma le ta’ita’i o le Faatuatua i le Atua Samoa ua Tasi, le susuga Laauli Leuatea Polataivao Fosi Schmidt, o teuteuga o le faavae e faasino i le tulafono o Faamasinoga o Fanua ma Asuafa ma teuteuga o le tulafono o faigapalota e tumau pea ona latou lagolagoina.
Na fesiligia le susuga Laauli mo sona finagalo ona o le saunoaga faaminisita a le tamaitai Palemia i le Palemene talu ai nei na faailoa ai e le afioga Fiame Naomi Mataafa, o le faatuatuaina pea o fuafuaga a le malo e ono fautuaina ai le Ao o le Malo e faata’ape le Palemene ae faia se palota tele pe afai ae lē pasia nisi o fuafuaga.
O ia fuafuaga e pei ona silafia o teuteuga o le faavae e faatino ai nisi o suiga i le tulafono o fanua ma suafa o le tausaga e 2020, faapea teuteuga o le tulafono o faigapalota, ma le tala autū mulimuli o le tupe.
O le avanoa na fesiligia ai Laauli na tāpā ai foi sona finagalo i le tulaga ua faatino e le latou pati faaupufai ua amata ai ona lesitala atu suafa o sui faatutū o le Faatuatua i le Atua Samoa ua Tasi mo le palota tele i le tausaga fou 2026.
Le susuga Laauli Leuatea Polataivao Fosi Schmidt o le ta’ita’ifono ma le ta’ita’i o le vaega faaupufai o le Faatuatua i le Atua Samoa ua Tasi.
