Ua faailoa e le Ofisa Sili o le pulega o le malosi tau eletise, e lē toe faasoaina le uila poo le eletise i le motu o Upolu, pe a ola afi suāuu e lima o loo lisi mai i se kamupani i Niu Sila lea ua faamautū nei i Fuluasou i le nofoaga o loo faasoa atu ai lea auaunaga tāua i le tele o vaega o Upolu.

O le fono ta’i vaiaso a sui o le komiti faufautua mo galuega lavea’i i taimi o faalavelave faafuase’i matuiā ma tusitala i le amataga o lenei vaiaso na faailoa ai lea fuafuaga e le Ofisa Sili le afioga Faumui Iese Toimoana.

O le a faailoa i le atunuu aemaise lava ia i latou uma i Upolu le faaolaina o afi lisi pe a oo ina mautinoa ua lelei atoatoa mo le faatinoina o le galuega o le gaosia o le eletise.

Le Ofisa Sili o le pulega o le faalapotopotoga o le malosi tau eletise le afioga Faumui Iese Toimoana i le feiloa’iga ma le vasega o tusitala.

Ua faailoa i le pepa o faasalalauga mai le ofisa o galuega lavea’i i taimi o faalavelave faafuase’i matuiā, o le Aso Toonai na te’a nei na taunuu mai ai isi afi eletise e atoa ai le lima o afi o loo lisi.

Ae i se faamatalaga lata mai i auala o fesoota’iga a le malosiaga tau eletise i le po anapo, ua faailoa ai o loo tālia le taunuu ai o le isi vaa o loo aumai ai meafaigaluega moomia mo le sootaga ma le faaolaina o afi eletise ua taunuu mai.