E ogaoga ma tugā manu’a o se taulealea 43 tausaga na maliu i se gaioiga solitulafono na faaaogā ai se taavale o le ituaiga o le RAV-4.
E nuti nisi o ivi ‘aso’aso o le fatafata o lē ua maliu, gau se tasi o ona vae, ma manu’a i lona ulu ma foliga.
O le faamatalaga lea o le lipoti a le foma’i na suesueina manu’a o lē na fano le soifua.
O faamaumauga a leoleo sa tuuina atu i le faamasinoga ina ua suesueina moliaga o le fasioti tagata faamoemoeina o Ta’ala Tiasi Tailo o Vaitele fou ma Pu’apu’a, o loo ta’ua ai o lē ua molia ma lē ua maliu sa auai i se inuga avamalosi na faia i le fale o se tasi o taulealea i Vaitele fou.
Na alu alu le fiafia vili e aiga tuaoi leoleo ona o le pisa, ma i’u ina laulauvavale ai lē ua maliu.
O le mafuaaga lea na tuli ese ai ma le inuga ma agai loa lē ua maliu i le auala ma savali ese ai e agai i lo latou fale.
Peitai o lē ua molia na ia fai i le tagata e ana le fale sa faia ai le latou fiafia e aua le popole o le a alu e so’a i lana taavale o le ituaiga o le RAV 4.
Na agai ese lē ua maliu faaola loa le taavale a lē ua molia ma alu loa e tuliloa.
E lei umi ona alu ese ae toe foi atu ma fai lana tala “ia ua oti, la ua taatia i o”.
Sa tetee Taala i moliaga a leoleo, ae ina ua mae’a suesuega a se laulau o faatonu i mau sa tuuina atu na taunuu i le latou faai’uga e faamaonia le moliaga o le fasioti tagata pa’ivalea.
O le faasalaga a le faamasinoga maualuga na fofogaina i le Aso Gafua o le vaiaso nei e iva tausaga e nofosala ai lē ua molia i le falepuipui.
O le faasalaga maualuga o lea solitulafono pe a faamaonia o le soloatoa i le falepuipui.
