O le asō lea na faia ai loa le i’uga mautinoa o le faipule o Hamilton i Sisifo, le susuga ia Gaurav Sharma, ua faate’a pe tuli motu ese mai le latou vaega faaupufai a le Labour.
O le vaiaso talu ai na faia ai le ulua’i faai’uga e faamālōlō lē tumau le alii faipule mai le latou vaega faaupufai, ona o le mataupu e pei ona lagalagā ai finagalo o le patī aemaise lava i le tamaitai Palemia, e tusa o ni lafoga faaali a le alii faipule e lē gata o ana tusitusiga i luga o lana itulau o le facebook, ae o ana faatalanoaga foi ma nisi o ofisa faasalalau.
Peitai e le’i avea lena faai’uga ma itu e tuuitiitia ai le aga’i pea o Sharma i le media e faaali pea ona manatu tetee ma faaalialia nisi o mea sa ia tuua’ia malosi ai le vaega faaupufai i nisi o ona sui i ni tuua’iga faapea o loo iai uiga saua fia malolosi (bully) o loo faaalia e nisi o sui faipule o le latou vaega faaupufai faapea foi isi sui o le Palemene.
Na matauina lava le taumafai o le tamaitai Palemia e saili se isi auala e faato’afilemu ai le mataupu e ui sa iai foi nisi lagona o sui auai o le pati faapea ua soona tuuaulafo tele foi le Palemia, atonu o le pogai lea o le faaauau pea o nei uiga o Sharma, peitai la o lea ua sau le lipoti lata mai i le aso lenei, ua faia loa le palota a sui o le faafaletui, ma o le 98 pasene o le faafaletui na palota e tuli ese, e to’atasi le sui e le’i fia faia sana palota, ma le isi sui e to’atasi na palota e na te lē taliaina lea faai’uga mo Sharma.
O le otootoga lenei o nisi o mea a alia’i mai na faia e Sharma e faasaga i le latou vaega ma le Palemene, lea ua i’u ai i le faai’uga e pei ona sau i tua i le asō.
Faasologa o mea na tutupu:
Aokuso 11: Faailoa e le faipule mo Hamilton i Sisifo ona manatu i luga o le NZHerald, ma ia tusia ai se faamatalaga e faapea, atonui e ofo tagata palota o itumalo na latou filifilia maia o latou sui faipule o loo i totonu o le Palemene, pe a latou vaai i faiga ia o loo onosaia e o latou sui faipule na filifilia, i faiga soonafai (harrasment) o loo faia i ai i totonu o le Palemene.
Aokuso 12: Na faasalalau e le Faipule sana tusitusiga e 2,600 upu i luga o le Facebook, na ia auiliili uma ai mea tiga na oo ia te ia ma isi tuua’iga o mea na tutupu ia te ia i totonu o le Palemene.
Aokuso 15: Toe tuu foi i luga o le facebook e Sharma isi tuua’iga fou ma ata o le taimi sa fai ai se faatalanoaga masani faalevaiaso a Ardern ma le aufaasalalau.
Aokuso 16: Na o nai minute talu ona uma se fonotaga a le faafaletui i le mataupu e uiga ia Sharma, ae ave lana text i le aufaasalalau e ta’u i ai o lea sa fai le feiloa’iga a le Labour ae le’i faaaofia ai o ia. O le aso lena na faasilasila mai ai e le Tamaitai Palemia, ua faamālōlō lē tumau Sharma mai le faafaletui poo le latou vaega faaupufai.
Aokuso 17: Na ta’ua e le Palemia e lei iai lava se isi la toe talanoaga ma Sharma talu mai ona faamālōlō lē tumau le alii faipule. Ina ua fesiligia pe na ia silafia poo se isi foi o le patī pe na iloa poo fea na iai Sharma, ae na saunoa Ardern, “e aunoa ma le faailoaina o faamatalaga e patino i na o sui o le vaega….ae mautinoa sa matou faia taumafaiga uma ina ia faamautinoa o loo iai se fesoasoani e maua mo ia, ma o le mea moni o lea matou te avanoa pe a ia moomia se fesoasoani”.
