O se feeseesea’iga i le va o se tamaitiiti a’oga ma se faia’oga i le taeao ananafi, i se a’oga i Waikato, na i’u ai i le taofia o lea tamaititi a’oga i le vaavaaiga a leoleo, ae na faamanu’alia le faia’oga ma auina atu ai i le falema’i i Middlemore i ni manu’aga.
O le toe lima i le 10 i le taeao ananafi na oo ane ai auaunaga mo faalavelave faafuase’i i lea a’oga, le Tuakau College i North Waikato, ina ua lipotia atu se tagata o loo faamanu’alia, ma na oo ane ma avatu faavave ai loa lea tamaitiiti a’oga e taofia i le vaaiga a leoleo.
Na oo atu le faasilasilaga a le pulega a a’oga i mātua e faailoa iai le tapunia o le a’oga (lockdown) ma ia aua ne’i oo atu se isi i le a’oga pe telefoni atu foi ne’i faalavelave a o aga’i le pulega ma i latou e gafa ma le su’esu’eina o le mataupu.
Mulimuli ane na faatuua vave ai loa le a’oga i le itula e 1pm i le aoauli ma mafai ai ona oo atu mātua e aveese mai a latou fanau, faapena foi i pasi na vave ona toe suia le taimi e oo atu ai e piki ese mai fanau a’oga.
Sa avatu ai ma le faamautinoaga i matua ma le lautele e lē o iai nisi tulaga lamatia mai lenei faalavelave, e ui i e lē o faailoa faalaua’itele mai e le a’oga i mātua auiliiliga o le faalavelave na tupu
Ua i lima nei o leoleo le su’esu’ega atili o lenei matāupu.
Puna o Faamatalaga: https://www.newstalkzb.co.nz/news/national/tuakau-college-in-lockdown-after-incident-that-s-left-one-person-seriously-injured/?dicbo=v2-PEIvO27
