Ua mae’a le faigapalota a le setete o Niu Sa Uelese ma e le o toe mamao se taimi ona faailo lea o le faigamalo fou ua manumalo ai nei le vaega faaupufai a le Leipa e taitai ai le alii o Chris Minns lea o le a avea nei ma premier o le setete. 

E tulaga ese foi lea faigapalota i le maitau a le toatele ona sa faia i se tulaga ua vaaia ai le maualuga o le fefaaaloaloai i le va o taitai e lua na tausinio mo le taitaiga o le setete.

Fai mai nisi pe a faatusa atu i isi faigapalota i tausaga ua tuanai e matuai sili atu ona ese ai lenei tausaga i le itiiti o faamatalaga e agai sao i le faaleagaina o le isi sui tauva aemaise o ni faalumaluma. 

Peitai o le tausaga nei ua atagia ai ituaiga tagata ia i taitai e lua sa tausino, Perrottet ma Minns ma talosia ia alualu ai pea faapea le tulaga lea i tausaga taitasi, o le ave o le faatāua i faigafaavae ma fuafuaga faataatitia mo le setete ae faaitiitia upu faifai ma faalumaluma i isi sui tauva.

O vaega sa ave iai le faamamafa a le itu ua manumalo nei e aofia ai tulaga i totogi, siitia o le aofai o tausi soifua ma paramedics atoa ai ma se fesoasoani mo faiaoga.

Fai mai le premier fou Chris Minns e le faigofie le galuega o le a alo atu iai.