Ua folasia i luma o le faamasinoga sili a le atunuu le molimau tusitusia a le faletua o lē sa avea ma Faamasino Sili, o Iliganoa Daphne Sapolu, ua faamatala ai le uili poo le will a lana tane faaipoipo, na ia faatoa iloa i le tuanai o ni aso talu ona falelauasi le afioga Patu Tiavaasue Falefatu Maka Sapolu.
Mo le silafia o le uili o se maliega tusitusia faaletulafono, a sē e ana ni tupe ma nisi meatotino e pei o eleele ma fanua, ua iai lona maliega e tuuina atu i se tagata poo ni tagata e iai ni ona piitaga ma sootaga e avea ai o ni a latou meatotino, latou te umia ai faaletulafono.
O Iliganoa Daphne Sapolu na lona tolu iai molimau a le itu tagi, ina ua amata valaau mau e suesue ai lana talosaga ua tuuaia ai nisi e aofia ai le tuafafine o lana tane faaipoipo o ia lea o Katalaina Sapolu, i le tapenaina o le uili e aunoa ma sona silafia, ma le tuuaiga e faapea sa faia lea tapenaga i se auala faasolitulafono.
O le molimau muamua a le itu tagi poo le itu talosaga, o se tamaitai faigaluega o se tagatanuu o Fiti, o ia lea sa tausimai i le tane faaipoipo a lē ua tagi, Iliganoa Sapolu, sa ia faamatala le aso 25 o Setema o le tausaga 2020 na faasaini ai o ia o se molimau i le tapenaina o le uili.
Sa faailoa foi e le molimau e tuuina atu pepa mo lana saini, ua iai le saini a le tane faaipoipo a lē ua tagi. Na ia ta’ua foi e lei silafia e lē e ana le uili le taimi na saini ai ona sa tofa a o taofia i le falemai.
I le molimau tusitusia a Iliganoa sa faitauina i luma o le faamasinoga, sa ia ta’ua ai na te lei silafia se tapenaga o le uili pe faailoa atu foi ia te ia se tapenaga o faia, ma tagata ua vaevae iai faamanuiaga o meatotino ma aseta.
O le Aso Lulu o le a fesiligia ai e loia a le Ofisa o Tausi Mavaega o loo tuuaia i le faamaonia o le uili, ma le loia a se tasi o tagata o loo aofia ia i latou ua aofia i le vaevaeina o meatotino o le uili, lē ua tagi poo le faletua ia Iliganoa Daphne Sapolu.
O molimau mai fafo e iai tomai i le suesueina o saini o le a suesueina muamua a latou molimau i le aso lona lua o lea faamasinoga. O nisi o molimau o le a tutulai e teena mau ua folasia e le itu tagi, o le tuafafine o lē e ana le uili, le afioga Lumanuvao Katalaina Sapolu.
E tolu aso ua faatulaga e tagofia ai lenei mataupu.
