Ua tulai i luma o le faamasinoga le tagata lea na molia i le ave faamalosi o se tagata i le faalavelave na tupu i se faletupe i Rotorua i le Aso Tofi.
O loo taofia le faailoaina o lona suafa ma faamaumauga ae na tulai i luma o le community magistrate i le aso ma e lei iai sana tali i moliaga o le ave faamalosi ma se moliaga o le faamatau e fasioti ma faaoolima.
O lana loia ua ta’ua sa ia talosagaina le taofia o le faailoa o le suafa o lea tagata ae o loo tetee le aufaasalalau i le faalilolilo o moliaga ua faamatuu e leoleo nisi faamatalaga ma o loo fia iloa foi e le lautele le tulaga ua oo iai lea mataupu.
Ua faataga e le community magistrate le faailoaina o moliaga ae faasā le faailoa o le igoa seia toe tulai i le faamasinoga i le aso 2 o Tesema.
O le mataupu o loo molia ai lea tagata na tupu i le faletupe o le BNZ Rotorua Central i le tea o le 4 i le afiafi ananafi lea na taloka ai faleoloa ma pisinisi i lea faaitu a o feutagai leoleo faaaupegaina ma lē ua molia nei.
