O le alii o loo tuua’ia i le maliu o le tina o Maria Brown 77 tausaga o Aukilani, ua tula’i i le faamasinoga maualuga i Aukilani i le aso analeila e faaaogā ai tomai faaonaponei i luga o le video mai le Mason Clinic. 

Fai mai lipoti a le Herald e le’i faia sana tali i moliaga ma o loo iai pea le poloa’iga e faasā ai ona faailoa le igoa a o faatali ai lipoti e tusa o le tulaga talafeagai o lona soifua mālōlōina e tula’i ai i le faamasinoga. 

Ua faatulaga mai e le faamasino le masina o Fepuari 2024 e faataunuu ai le mataupu i le faamasinoga. O le tina na aafia na maua atu ua maliu i lona fale i Moana Ave i Onehunga i le aso tonu o lona aso soifua, 5 o Iuni o le tausaga nei lava. E tasi le masina talu ona tupu le faalavelave ae faato’ā pu’e e leoleo lē ua tuua’ia nei. 

Fai mai le lipoti o si tina ua maliu na soifua ane i Samoa ae sa aumau i Niu Sila mo le 27 tausaga.