O loo tau faamautu nei moliaga uma a leoleo faasaga i se leoleo satini o loo faamalolo lē tumau, ona faatoa tuuina atu lea o se tali a lē ua molia i le solitulafono o le faiaiga faamalosi i se tamaitai o se leoleo talavou poo se junior officer.
O le Aso Gafua na tulai ai i le Faamasinoga Maualuga le susuga Laauli Magic Jr Laauli o loo molia i lea solitulafono ma ua toe tolopo ai i le vaiaso fou sana tali se’i faamautu moliaga uma.
O nai vaiaso e lei mamao atu na faailoa ai e le matagaluega o leoleo, falepuipui ma le fuataina le famalolo lē tumau o lea leoleo o loo umia le tulaga faaleoleo o le satini ona o se tuua’iga o se gaioiga tau faiaiga poo sexual connections i se tamaitai leoleo.
O loo faaauau ona tatala i tua Laauli i aiaiga masani e faatali ai le isi valaauga o ona moliaga.
