O se molimau ma lipoti atili mai a le pasese a le Latam Airlines lea na tulai mai ai se faafitauli ananafi, na faamatala ai le feei o le pasese ma fetagisi ina ua faafuasei ona tulai mai lea faaletonu i luga o le vaalele.
O se tasi o pasese na iai i lea faigamalaga na faatalanoa i le Breakfast ma ia faamatala ai le mea na tupu.
Ta’ua e Lucas Ellwood i lea faatalanoaga o le faaletonu na tupu ae ua ‘afa mai le faigamalaga ma o loo tufaina taumafa i lea taimi.
Na faafuasei ona tupu lea tulaga e foliga ua tapē atoa le vaalele ma pa’ū atu i se maualalo e lē mailoa.
Fai mai na ia vaaia le tele o ato ma telefoni feaveai, taumafa ma meainu ua salalau solo ma ia vaaia foi le agai ese mai o le vaalele mai se ao mafiafia ma sa iai se va tele i le ogatotonu o le ao.
Ina ua taunuu i Aukilani sa faatonuina le pasese ia onosai pea i o latou nofoa a o agai ane le vaega a le fesoasoani muamua e siaki pe iai nisi e manaomia le latou fesoasoani.
I se faamatalaga mai le Latam Airlines ua ta’ua ai o le faigamalaga lea a le Boeing 787 mai Sini i Aukilani sa iai se faaletonu na tulai mai ai o se technical problem na mafua ai ona malosi lona luluina.
E 13 le pasese na ave sa’o atu i le falemai i Middlemore mo togafitiga, e toatasi e tigaina.
