Ua tula’i mai le Manu Samoa 7 i le tulaga fā i le taamilosaga i Los Angeles i Amerika, ina ua mae’a lea taamilosaga o le lakapi ta’ito’afitu i le asō.
Sa amata mai lava taaloga a le ‘au a le atunuu i se tulaga lelei, e pei ona manumalo uma i ana taaloga mai lana pulu sa iai.
Muamua na manumalo i le la taaloga ma Kenya i ‘ai e 33 le Manu i le 14 a Keyna. Lona lua o le taaloga ma Sikotilani, na toe manumalo ai le Manu i ‘ai e 22 i le 7 a Sikotilani. O le taaloga mulimuli o le Pulu na taaalo ai ma Egelani ma toe manumalo ai foi i ‘ai e 31 le Manu i le 5 a Egelani.
Na see loa le Manu Samoa e taalo ma Argentina i le Quarter Final mo le Ipu, ma toe manumalo ai i ‘ai e 24 i le 19 a Argentina.
Peitai o le aga atu i le taaloga ma Niu Sila na su’e ai i le Semi Final, o iinā loa na faato’ā pa’ū ai le taumafai a le Manu ina ua malolo ia Niu Sila i ‘ai e 26 i le 28 a Niu Sila. O se taaloga mata’ina ma le taufai malolosi o ‘au e lua, ma e mae’a le ‘afa muamua o sili ‘ai o le Manu a Niu Sila, peitai o le toe foi mai le ‘afa lona lua, na vaaia ai loa ua tau iai nai pu’e a le ‘au ua misi.
O le faa’ina mai o le Manu i le la taaloga ma Niu Sila, na see ai loa e su’e le tulaga 3 ma le 4 i le la taaloga ma Ausetalia, ma o le i’uga na manumalo ai loa Ausetalia, ma tulai mai loa le Manu Samoa i le tulaga 4.
E ui lava ua lē taulau o le faamoemoe i le siamupini e pei ona tausinio uma i ai ‘au o le taamilosaga, ae sa faamalieina lava le maimoa a le atunuu i le maoa’e o le faatinoga e alo ma fanau a Samoa o le taaloga e pei ona ua toe lalaga mai ai nei lo latou malosi ma le tomai i le lakapi.
