Ua talia e le Faamasinoga Sili a Samoa le talosaga a le susuga Papalii Malietau sa avea ma Komesina o le Ofisa o le Komisi o Faigapalota, ina ia taofia le suesueina o moliaga e 12 a leoleo sa molia ai, e mafua i se gaioiga sa tuua’ia ai i lona faasese o ni faamaumauga i faamatalaga o sana malaga i se fono i fafo atu o Samoa, a o avea ma faauluuuga o le ofisa o faigapalota.
Sa finau Papalii Malietau ma lana loia le tofa Unasa Iuni Sapolu, o le faatoa faia e leoleo o moliaga i le tuanai o le lima tausaga talu ona faia suesuega a leoleo, o se gaioiga ua solia ai taiala faaletulafono o galuega tau faamasinoga poo le breach of judiciary process.
Sa finauina foi e le itu talosaga o lea faatamala ua aafia ai ma tulaga o le faamasinoina o le ua tuua’ia i auala faaletulafono e maua ai se faaiuga sa’o ma faamaoni poo le fair trial.
Sa faia foi le suesuega faalotoifale a le Komisi e pulea galuega a le Malo i le mataupu, ma fautuaina ai e fai se aoaiga o le sa tuuaia ma totogi se sala tupe e tasi le afe tala.
Peitai e aumai le faaiuga lea ae ua iai le fautuaga a le Loia Sili i lea taimi, e faia ni moliaga solitulafono.
Ua manatu le faamasinoga i lana faaiuga, a faaauau ona suesue moliaga e 12 pe a fua i mau ua finauina e le itu talosaga e tatau ai ona faamuta ma taofia le suesueina o solitulafono ua tuuaia ai Papalii Malietau, o le a faaauau ai ma le solia o taiala faaletulafono e tatau ona mulimulitaia mo le tuuina atu o se moliaga e suesue e le faamasinoga ma faia iai se faaiuga.
O le mataupu lenei ua faatulaga e suesueina molimau i le tausaga fou 2023, ae talu ai le faaiuga ua taoto iai le talosaga a le itu tagi, ua faamuta ai ma le suesueina o moliaga a leoleo.
