Ua taunuu le fono a le itumalo faapalota o Safata 2 lea sa usuia i le Aso Lulu o lenei vaiaso, i le lagolagoina o le tuua e lo latou sui faipule o le vaega faaupufai e puipuia aiā tatau a tagata, ae lagolago i le patī faaupufai o loo tumalo le Faatuatua i le Atua Samoa ua Tasi.
O le taunuuga lea o le fono sa auai sui o afio’aga e ono o le itumalo palota ae ua latou finagalo foi e na o le afioga Tuia Pu’a Fuatogi Letoa lo latou sui faatū pe a faia lana palota laitiiti i se taimi o le a faamautū ai lea tapenaga.
Sa maua se talanoaga ma le sui faipule o Safata 2 i le afiafi o le Aso Lulu i fesoota’iga faaonaponei ma tāpā ai sona finagalo.
Se vaega o le talanoaga ma le afioga i le faipule o Safata 2, le afioga Tuia Pu’a Fuatogi Letoa i le tulaga ua taoto ai nei le finagalo o lona itumalo faapalota.
O le taimi nei e le’i faamautūina tapenaga i se aso e momoli atu ai le afioga Tuia i le vaega faaupufai o le Faatuatua i le Atua Samoa ua Tasi.
O loo tapena foi le sui faipule i ala aloa’ia faaletulafono o le tuuina atu o lana faamavaega tusitusia i le patī e puipuia aiā tatau a tagata, ma le tusi e tuuina atu i le afioga i le Fofoga Fetalai.
O se taimi ona faailoa aloa’ia lea o le faai’uga a le sui faipule ma faasilasila ai ma le avanoa o le nofoa o Safata 2.
