O oloa mo le atina’e o faatoaga e pei o fanavao, meafaigaluega e faaaoga i togalaau’aina, maumaga, togafai, ma isi laau tau faatoaga, oloa mo faigafaiva e pei o upega fagota, moliuila lama, o seevae maulu ma mata fagota, paopao nofoa lua, ma oloa e pei o uaea mo pa puaa ma pa i’a, moavao, o suo tipi ma isi e pei o pusa e faamalulu ai i’a poo coolers ma pusaaisa, ua tufa nei mo le vaega muamua o le poloketi o le tasi le miliona tala a le itumalo faapalota o Faleata 4.
Mo faigafaiva ua faaalia e se sui o le komiti mo le poloketi a le itumalo, e sefulu paopao nofoa lua tai valu selau tala i le vaa e mae’a ona ta paopao e fā i le faaiuga o le vaiaso nei ona momoli ane lea mo aiga o loo manaomia ia vaega tāua mo le faaaogaina i o latou faiva e tatao pe tauta ai o latou upega fou ua maua i le poloketi.
O le 425 afe muamua lea o le 850 afe o loo totoe o le tasi le miliona tala mo Faleata 4 lea ua faatau ai isi oloa manaomia mo aiga ma tagata palota o le itumalo e silia i le 200, ae o isi aiga ma tagata palota e lei oo iai le tufatufaga muamua, o le a faatoa afea i le vaega tupe 425 afe mulimuli, lea e faatoa tuulima atu i le itumalo pe a oo atu tala o tupe ma le lipoti a le suetusi i le faaaogaina o le 425 afe muamua ua faatau ai oloa e pei ona faailoa atu, lea na tufatufa i le Aso Lulu o le vaiaso nei.
O lea tufatufaga ua ave ai ma le fautuaga a le sui faipule o Faleata 4 o ia o le taitaifono o le komiti o le poloketi, e tatau i aiga ma tagata uma ona faamaoni i le faaaogaina o mea faigaluega ua latou maua, auā a alu atu le galuega a le komiti e asiasi poo lelei ona faaaoga ae ua iai se faaletonu, e le gata ina faasala ae le toe agavaa i le isi ta’i miliona tala o le a faasoa mai e le Malo i tausaga e tolu o loo totoe o le poloketi.
Le taitaifono o le poloketi tasi le miliona tala a le itumalo o Faleata 4 le afioga i le faipule le tofa Ale Vena Ale.
