Ua folafola e le pulega o tupe teu faafaigaluega i Samoa le SIFA, le maua e tama o le tatou aulakapi taitoafitu o se taui e sefulu afe tala a le tagata taalo pe a manumalo i le Ipu o le siamupini o le taamilosaga faavaomalo o loo auai i tausaga uma.
Ua folafola ai foi e lea auaunaga a le Malo, e maua foi le faamanuiaga tupe mo le autaitoafitu a le Manu Samoa, pe a ia ausia le tulaga 2, 3, ma le 4 o le taamilosaga.
Ua faailoa e le Ofisa Sili o le pulega o le Lakapi Samoa le susuga Faleomavaega Vincent Fepuleai, o le sauniga na faia i le faaiuga o le vaiaso na tea nei na tauaao ai e le Minisita o Tupe o loo iai ma le vaaia o le SIFA meaalofa tupe mo tama o le aulakapi taitoafitu, ona o le manumalo i le Ipu o le vae o le taamilosaga na faia i Cape Town i Aferika talu ai nei, na faailoa ai lea ofo a le SIFA.
Na faailoa ai foi le maua e tama o le aulakapi taitoafitu o le tai lima afe tala pe a manumalo i vae o le taamilosaga i Hong Kong, Singapore ma Dubai.
O le mafuaaga ona o atunuu ia o loo faatino ai faiga faapisinisi a le SIFA poo le Samoa International Finance Authority.
O le manumalo o le tatou aulakapi taitoafitu i Cape Town i Aferika i Saute talu ai nei, ua faameaalofa ai i tama o le ‘au, le faiaoga ma le pulega le ta’i 3 afe tala a le tagata e toatasi.
