O tupe alu ma’umau a le atunuu na fausia ai le falemai mo Fagaloa, ae oo mai i le taimi nei e lei mae’a ma ua sosolo ai le fue ma avea ma nofoaga e nonofo ai manu papalagi.

Ua faailoa lea faaletonu i fuafuaga sa faia i ni tausaga ua tuanai e fausia lea falemai faaitumalo ina ua tali le minisita o le soifua maloloina i le augani a le faipule o Vaa o Fonoti le tofa Mau’u Siaosi Puepuemai, ia silasila le Malo mo se falemai fou e fausia i lea vaega o le atunuu.

Na faailoa e le Minisita le afioga Valasi Luapitofanua Toogamaga Tafito Selesele, ua logoina o ia i ni vala na mafua ai ona le mae’a lea galuega, ma ua ia faailoa foi lona faafetaia o le faipule o Vaa o Fonoti ona o loo tuitui atu pea ma o nisi aso e oo atu lava i lona ofisa ma se taumafa o le pizza. 

O le tali a le Minisita o le soifua maloloina, ua toe tatalo ai le faipule o Aleipata Itupa i luga i se auaunaga a le falemai faamama toto i le falemai i Lalomanu, ona o le taugata o le malaga mai i le falemai i Motootua o gasegase mai lona itumalo e faamama o latou toto.

Ua polili atu foi e le faipule o Anoamaa numera tasi le talosaga i le minisita, mo se falemai fou mo lona itumalo. O mataupu uma nei ua taatia nei i le ato o talosaga a le minisita o le soifua maloloina i le faamoemoe o le a silasila iai le faigamalo.