O le tamaitai aoga o le Tausaga 11 (Year 11) o Telesia Tanoa’i mai Niu Sila, mai ona tupuaga Samoa, ae ua tulai mai lenei tamaitai i se tulaga maoa’e, ina ua tulaga tolu i le tauvaga lona 16 a le Chinese Bridge Competition, o se tauvaga sili ona telē i le lalolagi a le gagana Saina ma le poto salalau mo tamaiti aoga o secondary schools.
O Telesia Tanoai, sa aofia ai i le to’a 168 o tamaiti aoga na filifilia mai o finalists ina ia faimalaga atu i Saina mo le vaega faaiu o lenei tauvaga, o i latou na sa filifilia mai le to’a 45,000 o tamaiti aoga na tauva ai i tauvaga amata (preliminary competitions) i le kelope aoao.
O Telesia Tanoai na aofia i le toalima pito i luga (top five) ma na avea ai o ia ma sui o le Oceania, ma iu ane le tauvaga faaiu ua tulai Telesia i le tulaga lona tolu.
E tele vaega eseese sa faia iai le tauvaga e pei ona ta’ua e Telesia ina ua faatalanoa atili e le sui o le Radio New Zealand, ma o se tauvaga sa matuā tofotofoina ai le atamai ma le mataalia o lenei tamaitai.
O nisi o vaega iloga o lenei tauvaga, le lauga e faailoa uma ai mataupu eseese, ae ia faatino foi ma sana taleni, ma o nei vaega uma e faatino i le gagana Saina; o lana taleni o lana rap.
Na ta’ua e Telesia, sa ia faatino ma le mitamita lenei tauvaga, e le gata i le faatinoga o vaega o le tauvaga ae sa ia laeiina ona laei Samoa e faalauiloa atu ai lona faasinomaga o se tamaitai Pasefika.
O Telesia o ona tupuaga e mai afioaga o Falealili, Afega, Saleimoa ma Sala’ilua.
