E totogi pea rates o fale o aiga Aukilani ua le o toe nofoia poo ua red stickered.

O le tala lea mai le Auckland Council e pei ona molimau ai i le Stuff ma o lea e tusa ma le 2,766 fale ua lanu mumu poo ua lanu samasama foi le sticker ua faapipii ai, o lona uiga a lē ua faasā ona toe ulufale iai se isi, pe o loo faatapulaa ona o le manumanuga i le saogalemu.

E oo mai foi ananafi e 61 tagata Aukilani o loo nonofo pea i fale le tumau ona ua leai ni fale.

E le o faigofie i tagata e iai o latou fale motu lea e totogi pea rates, e ui e le o toe nofoia.

I lipoti o loo molimau ai le toatele o i latou nei i lo latou manao, ina ia taofi e le Council rates nei o loo totogi pea seia oo ina toe foi i fanua ma fale.

Peitai fai mai le Council e le o mafai ona taofi motu le totogiina o rates ae o loo maua le fesoasoani e totogi auaua’i ai ae o le a iai foi le tului faaopoopo.

Ua fai mai ai foi le Council o rates nei o loo faataatia mai ia Iuni ma o ā foi mea ua faaleagaina o fale ona o le afā e faatoa toe maua le isi tau fou mai ia Iulai o le tausaga nei e fua i iloiloga o loo faagasolo nei.

O le fautuaga o le faaulu o se talosaga mo se fesoasoani agai i le Emergency Relief Fund poo le telefoni atu foi iai.

A o fai mai ai la le Council e valaau atu i le telefoni, ae ua molimauina e nisi ma ua faamaonia foi e tala fou le fiu e tatali.