O le masina fou o Tesema ua tolo iai galuega a le faamasinoga o faigāpalota mo le su’esu’eina o le talosaga e ave i tua le tagi tau palota mai le itumalo o Falealili 1.
O le Aso Faraile ua mavae na valaau ai le matāupu lenei mo nisi o tapenaga e ao ona faamautū e pei o le talosaga a le vaega faaupufai e puipuia aiā tatau a tagata e fia auai lea ua talia.
Ua talia ai foi ma le iai o se loia e tula’i mo le sui faipule o lea patī faaupufai le tofa Namulauulu Papalii Sami Leota Papalii, sa ave iai le poloa’iga e oo atu e tula’i e molimau i le māfua’aga o le fia auai o le latou pati, e ui ua taoto atu i le faamasinoga lana tusi e lē fia auai i le faamasinoga.
O le Aso Faraile foi ua mavae i taualumaga a le faamasinoga i le matāupu lenei e le’i oo atu le loia ua tula’i mo le finauina o le tetee a le tofa Tuiloma Tusa Laniselota Lameko faasaga i le talosaga a le H.R.P.P. e ui ua talia le auai o le vaega faaupufai i le finauga i le māfua’aga o le a toe ave ai i tua le tagi tau palota.
Ua fautuaina ai e le Faamasino Sili le loia o loo tulai mo le tagi tau palota ia logo le tama’ita’i loia o Unasa Iuni Sapolu e tāua lona auai i le faamasinoga pe a toe tauaofia i le aso 3 o Tesema.
O le lua vaiaso ua tolopo ai le su’esu’ega ua faatonuina ai loia a itu auai ina ia tapena atu folasaga poo submission e lē gata o folasaga e tali ai i le talosaga a lē na faauluina le tagi tau palota e ave i tua lana tagi ae o folasaga foi e aga’i i le māfua’aga e lē tatau ai ona ave i tua le tagi.
O le tofa Tuiloma Tusa Laniselota Lameko sa tauva i le fu’a a le H.R.P.P. i le nofoa o Falealili 1 i le palota tele, o ia lea na tuuina atu le tagi o moliaga o faatosina faaālatua faasaga i le sui faipule o le itumalo na toe filifilia i le faigāpalota tele, le afioga Toelupe Maoiautele Poumulinuku Onesemo.
Na faatulaga le valaauina o molimau o le tagi ae oo ane i le Aso o lea su’esu’ega ua iai le autasiga o finagalo o lē na tagi ma lē na faasaga iai moliaga ina ia toe faasolomuli i tua le matāupu.
O lea autasi na fausia ina ua iai foi le finagalo o le sui faipule e ave ai i tua ma ana moliaga faasaga i lē na faauluina le tagi faasaga ia te ia.
