Ua ausia maliega i le va o le iuni ma le pulega a le ofisa o tineimu, ma e le taumate o le a faaosofia ai tagata e fia galulue i lea auaunaga.

O lea ua tausaga ma le ‘afa o fefaloa’i itu nei e lua ona o totogi, ma o lea ua mae’a sainia taiala e taitaiina ai maliega fou.

O se taunuuaga ua sau ai i le mae’a ai o solo tetee na faia a le aufaigaluega peitai o lea masina talu ai na le taunuu ai nisi o tetee ina ua ofi mai i totonu le malo ma aumai lana fesoasoani.

O le ofo fou ua iai nei e tusa ma le $145 miliona, ma e $100 miliona e sili atu ai na i lo le ofo na fofola mai i le masina o Iulai.

O loo afifi mai i le ofo le siitaga e oo atu i le 24% toe faafoi i le 2021 lona aloaiaina.

O le ofo o loo sau ai – 

• Polokalame e lagolagoina ai le aufaigaluega;
• $1,500 le ponesi e maua e le tagata fou i le vaiaso o le Kerisimasi;
• Peimeni e faatasi ona maua e le aufaigaluega o loo i Aukilani faapea ai nisi o alauni; atoa ai ma fesoasoani tau tupe mo sui uma e saofagā ai i inisiua e le gata i le inisiuaina o soifua ae faapea tupe maua.

Mai le iuni o se maliega ua mafai ona oo iai ona o le lagolago a le malo.

O lea o le a folasia atu i sui o le iuni lenei maliega faia faatasi ma o le a amata faasolo fonotaga auā lona faapalotaina.

E i le va o le $10,000 ma le $20,000 le siitaga o totogi o fuimu e amata mai ia Iulai o le tausaga fou.