E toalua ni fanauiti ma se pepe o loo suesueina e leoleo le mafuaaga o latou maliu, e pei ona faailoa e le sui Komesina o le Matagaluega o leoleo, falepuipui ma le ola toe fuataina le susuga Papalii Monalisa Tia’i Keti, i le feiloaiga ma tusitala i lenei vaiaso.

O ia maliu e tolu e aofia ai le tamaititi 16 tausaga na fano le ola ina ua solo iai se sitepu sima. O le tasi o tamaititi e le o faailoaina le matua na faailoa e le sui komesina na moe ma maliu ai lava, ae o le pepe e tolu iai maliu na faaalia e Papalii Monalisa na fanau mai ua uma lona ola.

I le amatalia ai o galuega o le fausia o le nofoaga i Tafaigata mo le kolisi mo aoaoga faaleoleo ua faailoa e le sui komesina i lea feiloaiga, o loo gafa le matagaluega ma le faaooina atu o le suavai, le eletise ma isi auaunaga manaomia e pei o tagata e galulue mo le puipuiga o le nofoaga, a o faamautu ai inisinia ma isi tagata faigaluega a se konekarate faufale mai Saina ua filifilia e gafa ma le fausia o le nofoaga.