O le a lē taalo le alii o Ben Lam i le taaloga faaiu o le latou Pool lea o le a taaalo ai le Manu Samoa ma Egelani, ona e tolu taaloga ia ua faasala ai Lam e le toe taalo ai, mafua mai i lana pue matautia i le tau’au lea na taia ai le ulu o le alii o Pieter Labuschagne o le ‘au a Iapani i le latou taaloga i le Aso Fraile talu ai.
Na muai faasala Lam i le yellow card ae o lea na mulimuli ane toe siitia i le red card. O le taaloga lea na uma ane le 33 minute faaiu o le taaloga ua na o le 14 le ‘au a le Manu Samoa o loo taaalo, ma manumalo ai Iapani i ‘ai e 28 i le 22 a le Manu Samoa.
I le taimi na fofoga ai i luma o le komiti faafaamasinoga lenei mataupu, na taliaina e Lam o lana gaioiga sese na fai e tatau ona red card e faasala ai.
Na amata mai le faasalaga a le komiti i le 6 taaloga e tatau ona lē taaalo ai Lam, peitai ina ua silasila i le tulaga o lona taliaina o lana sese na fai, o lana faatoesega ma lona tulaga o se alii taalo lelei, o lea na toe faa’afa ai loa e le komiti le sala i le na o le 3 taaloga o le a misi ai Lam.
O le a lē taalo la Lam i le taaloga a le Manu Samoa ma Egelani i le Aso Sa nei (taimi NZ), ma nisi taaloga se lua a le Manu pe a te’i lava ua iai se avanoa e toe fai ai ni ana taaloga se 2 (knockout stage games).
A lē o lena, o le a ia misia ai isi ana taaloga e lua o lana kalapu (Montpellier club games).
O le alii 32 tausaga o lona soifua, Ben Lam, sa taalo muamua i le Hurricanes, o lana taaloga faitaulia muamua ua taalo ai mo Samoa o lea na taaalo ai ma Argentia i le 10 aso talu ai.
