Ua faatali nei se faasalaga e faia e le faamasinoga a leoleo le Police Tribunal mo le leoleo asiasi le susuga Li’o Faataumalama Auava ma le tamaitai leoleo taai lua o Henifa Bryce, lea ua faamaonia o la moliaga o le faatamala i le faatinoga o o la tiute faaleoleo e pei ona la talia ma faamaonia faamatalaga tusitusia mai tagata sa o la faatalanoa i le suesuega i le maliu o Tuuau Faasavalu, lea na faia le suesuega e aunoa ma se faatagaga a le Komesina o leoleo.
O loo faamalolo lē tumau ia malu o le Malo a o faagasolo taualumaga o la moliaga, e pei ona mae’a le faamasinoga faaleoleo, ae o loo tālia moliaga i le faamasinoga o soligatulafono lea o le a tulai ai Li’o Faataumalama Auava, ma isi tagata e toafā e aofia ai le sui faipule o Salega le tasi o loo tetee uma i o latou moliaga i le faamasinoga faaitumalo le District Court.
I le faamasinoga a leoleo ua mae’a ona taualumaga, e lima moliaga o le ta’ita’i leoleo asiasi lea e tolu ua faamaonia ae lē faamaonia le lua.
O le leoleo taai lua e lua ona moliaga e tasi ua faamaonia ae o le isi ua lē faamaonia.
O le Aso Faraile na te’a nei na lau ai le faaiuga a le faamasinoga faaleoleo i le tuanai o le masina o Aperila na suesueina ai moliaga e pei ona sa valaau ai molimau.
O le sui Komesina le afioga Afamasaga Samuelu na avea ma ta’ita”ifono i le laulau na suesueina molimau lea sa aofia ai se tamaitai ta’ita’i leoleo asiasi ma se loia.
Na faaalia e Li’o Faataumalama i le mae’a o le lauina o le faaiuga, o le a talanoa i lana loia o se KC poo se King Counsel mai Niu Sila pe faaulu se la talosaga e toe iloilo ai le taunuuga o suesuega poo se apili.
