O le penisiona a le aumatutua ma le faamanuiaga tupe mo tagata e iai manaoga faapitoa, ua iai le fuafuaga a le Malo o le a maua se fesoasoani tau tupe i le tausaga fou.
O le aupenisiona o le a maua le faaopoopoga e 50 tala ia latou tupe masani o loo maua mo masina e tolu amata ia Aperila e oo i le masina o Iuni, ae o tagata e iai manaoga tumau o le a maua foi le 50 tala e faaopoopo ia latou faamanuiaga tai selau tala i le masina.
Ua na o le masina o Aperila ma le masina o Me o le tausaga fou o le a maua ai lea fesoasoani.
O loo faailoa lea fuafuaga i le tala faaopoopo o le tupe muamua mo le tausaga faaletupe o loo faagasolo, ina ua folasia i le Palemene i le vaiaso nei e le minisita o tupe lea fesoasoani i le tala faaopoopo muamua o le tupe.
E le o faailoaina pe aisea o le a na o le tolu ai masina e maua ai le 50 tala faaopoopo o le penisiona a tagata matutua, ma le lua masina e maua ai le 50 tala faaopoopo i luga o faamanuiaga tau tupe tai selau tala o loo maua e tagata e iai manaoga tumau, mo masina o Aperila ma Me o le tausaga fou.
O le tasi o fesoasoani o le lua pasene o le tului faapitoa mo tagata faisaofaga i le NPF, ma o le a amata maua i le aso 23 o le masina o Ianuari o le tausaga fou.
Faaalia e le Minisita o Tupe le afioga Mulipola Anarosa Ale Molioo i lana saunoaga i le Palemene i le tala faaopoopo muamua o le tupe, e 19 miliona tala e faaopoopo atu i luga o faamanuiaga sa faatinoina mo le aufaisaofaga na maua ia Iulai ma Tesema o le tausaga nei.
