E uma ane ananafi e faagata ai talosaga o palota toe faitau, e na o le tolu itumalo ua faaulu aloaia talosaga e tatau ona toe faitau a latou palota.
O le mae’a faailoa mai ai o le faitauga aloaia o le palota a Niu Sila i le Aso Faraile o le vaiaso talu ai, na tuu mai ai aso e tolu e faaulu ai talosaga, ma o itumalo e tapuni ane le avanoa ananafi ua faaulu a latou talosaga, o Nelson, Mt Albert ma Tamaki Makaurau.
I nisi o lipoti e faapea o le taeao nei e amata toe faitau ai le palota a Nelson, ae o Mt Albert ma Tamaki Makaurau e mai le Aso Gafua o le vaiaso fou.
E leai se taimi faatapulaa ua tuuina mai e toe faitau ai ma o loo agavaa foi sui momo’e na tauva i faigapalota a itumalo nei e tolu e auina atu ni o latou sui e molimauina le toe faitauina o palota.
Mai itumalo faapalota nei e tolu e tasi o loo faatalosagaina e le Labour, o le itumalo lea o Tamaki Makaurau lea e 4 palota o loo sili ai le sui o le pati a Maori, Takutai Tarsh ia Peeni Henare o le Labour.
O le isi lua o loo finauina e le National, lea o loo sili ai le sui o le Labour i palota e 20 i Mt Albert, ma Nelson o loo sili ai foi le sui o le Labour i palota e 29.
Afai ae uma ane e iai se suiga i le iuga o palota, o le a faatonuina loa e le faamasinoga le komisi o faigāpalota e toe sui le poloaiga aloaia mo itumalo nei.
