Ua mautū tapenaga o le ta’amilosaga lona iva o le lakapi pa’i a le kalapu ta”alo a le Malisi mo lenei tausaga lea e fa’agasolo i le fa’aiuga o le vaiaso nei i le Aso Faraile ma le Aso Toonai.
Ae o le taamilosaga lenei o le a tausiniō ai ma ‘au masi’i mai Ausetalia i le setete o Niu Sa Uelese, o le ‘au mai Fiti ma le ‘au mai Niu Sila.
O le tausaga lenei i le ta’amilosaga o le a manatua ai se tasi o tinā o le atunuu ua fai i lagi le folauga, ae sa lotolotoi i le ta’aloga e le gata o se tagata ta’aalo ae sa iai foi lona sao i le faagaioia o le ta’amilosaga, o ia lea le afioga Seumalu Shelley Burich, o se tinā sa galue foi i le Sosaiete o le Kanesa.
O le ta’amilosaga foi lenei e pei ona fa’ailoa e le kalapu ta’alo a le Malisi i Samoa o se tasi o ma’a tulimanu i le kalena o taaloga a le kalapu i tausaga taitasi.
O le a fa’asalalau e le faletelevise o le TV3 le taamilosaga. O ‘au fēfiloi poo mix a ali’i ma tamaita’i faapea ‘au a ali’i ma ‘au a tamaita’i o le a tausinio ai.
