Ua talia le talosaga a le loia o loo finauina le su a le afioga Savalenoa Mareva Betham Annandale sa avea ma loia sili a le Malo, i se avanoa e toe tuu atu e tapena ai nisi molimau tusitusia e tali ai i le finauga a le Loia Sili o iai nei o loo finauina le itu a le afioga i le tamaitai Palemia, o loo tuuaia e Savalenoa Mareva i le solitulafono o le faaiuga na faamuta ai lona tofiga Loia Sili.
O le isi lua vaiaso o lumanai nei e toe valaau ai lenei mataupu e pei ona faatulaga mo le aso 17 o Aperila.
E silia i le 600 afe tala o loo tagi ai lē sa avea ma loia sili e totogi atu ona o le faamutaina o lona tofiga.
Ae i le talosaga a lē sa avea ma Peresetene o le Faamasinoga o Fanua ma Suafa, le afioga Fepuleai Attila Ropati, ua toe apili ai le faaiuga a le faamasinoga sili, na teena lana talosaga mo se poloaiga e faaauau lona tofiga, o lea ua taatia nei e valaau i luma o le faamasinoga o talosaga toe iloilo poo le faamasinoga apili a le faamasinoga maualuga, o le a tauaofia i le masina o Iuni o le tausaga nei.
