O timuga mai le Aso Tofi o lenei vaiaso faasolo atu i le faaiuga o lenei vaiaso, ua mafua ai ona le faataunuuina le taamilosaga lona 4 o le lakapi taitoafitu o loo lagolago e le kamupani o le Vodafone, lea na faagasolo i Savaii i le faaiuga o le vaiaso na tea nei le vae lona 3.
Ua faailoa e le pulega o le Lakapi Samoa, ua faaletonu malae taalo o le Apia Park ma le Malisi i Lotopa i lologa ona o timuga ma e sili ai le faataatia ae tulimatai le faaiuga o le vaiaso fou.
O le tele foi o isi taamilosaga tau taaloga sa fuafuaina mo le faaiuga o lenei vaiaso, o le tulaga foi lea ua taoto iai, o le tolopo seia toe lelei uiga o le tau.
