Ua malilie uma nei loia a le a itu auai e pei o le vaega faaupufai e puipuia aiātatau a tagata, o le Faatuatua i le Atua Samoa ua Tasi, o le Loia Sili a le Malo, ma le loia mo le Fofoga Fetalai e faatali se taunuuga o le lafo o le lē faatuatuaina o loo taumafai ai le Itu Agai e faamuta le tofi Palemia o le afioga Fiame Naomi Mataafa ona faato’ā toe valaau ai lea o le finauga a le itu faaupufai o loo agaia le malo, lea o loo tatalo ai i le faamasinoga mo se poloa’iga e faamuta ai le tofi Palemia o le afioga Fiame Naomi Mataafa.

O le taunuuga lea na malilie iai loia ina ua valaau i le Aso Gafua o lenei vaiaso lea talosaga.

E iai le talitonuga afai e saofia le lafo o le lē faatuatuaina o le muta’aga lea o lenei mataupu tau faamasinoga, ae afai e leai, o le Aso Tofi nei e toe valaau ai mo le faatulagaina o se aso e tuuina atu ai finauga faaletulafono a loia a le itu talosaga, ma loia a itu o loo molia pe o loo faasaga iai le talosaga a le Itu Agai.

O le afioga i le Faamasino Sili afioga Satiu Simativa Perese o loo seei i le tauaveina o lea mataupu.

Lipoti lata mai:

O lea ua mae’a le fonotaga a le Palemene i le taeao analeila ma ua mautinoa ai, ua lē talia pe ua teena le lafo sa faatū e le ta’ita’i o le Itu Agai, ina ua uma ane le palota tauvala’au e to’a 15 sui na lagolagoina le lafo, ae to’a 34 sui na teena le lafo.

O lona uiga la e pei ona taatia mai ai le faai’uga a le faamasinoga i le aso ananafi, pe afai ae teena le lafo, o le Aso Tofi nei la e toe valaau ai loa lenei mataupu ina ia faatulaga mai ai se aso e tuuina atu ai finauga faaletulafono a loia a le itu talosaga, ma loia a le itu o loo faasaga iai le talosaga a le Itu Agai.