E le taumate na faate’ia mātua ma le fanau aoga i le taeao analeila i le tofu atu o se taavale i se tasi o potu o se aoga i Albany a o momoli atu le toatele o fanau mo le amataina o aoaoga i lenei foi vaiaso.
Ua lipotia i le Stuff i le asō le taavale na tofu i totonu o se potu aoga fai mai le pule o le aoga lea, e moni o le faalavelave lea na tupu ma sa iai tamaiti aoga ma faiaoga i le potu lea i le taimi na tupu ai le faalavelave.
Fai mai le puleaoga e lē tele ni mea o faaleagaina o le potu ma o loo manuia uma foi faiaoga ma tamaiti aoga.
Sa faailoa e le pule o loo faaauau pea ona faia lesona i le potu aoga ae ua valaau pea leoleo ona o tulaga e ao ona faatino.
Fai mai leoleo poo le tea laititi o le ‘afa o le valu i le taeao na agai ane ai le latou fesoasoani i le mataupu lea ma e talitonuina e feololo manu’a o le avetaavale ma e leai se isi tagata o aafia ma e le tele foi ni mea na faaleagaina i le potu aoga a o faia ai a latou suesuega.
O lipoti a nisi molimau na ta’ua ai o le taavale o le SUV lanu paepae ma o loo faatalia se isi lipoti mai leoleo e tusa o lenei mataupu.
