Ua seei mai nei le afioga Nonu Saleimoa Vaai i le tofiga o le Taitaifono o le Komisi o Tagata Faigaluega a le Malo le PSC. Ua faapena foi ona tofia ai e le Kapeneta ma isi sui fou e toalua e faaatoa ai sui e toatolu o loo tatau ona seei i lenei foi komiti tāua a le malo.
O le afioga Nonu Saleimoa Vaai, o ia lea ua suitulaga nei i le tofiga e pei ona sa tofia i ai le afioga ia Lauano Vaosa Epa na te faaauauina mai le tofiga ina ua faamavae le taitaifono sa iai mai le faigamalo talu ai, le susuga Aiono Mose Su’a. Peitai o le vaiaso talu ai na tauaao ai e le Kapeneta le tusi faamavae a le faletua ia Lauano Vaosa Epa, ma faia ai loa tofiga e pei ona ua taatia mai nei.
O le Komisi fou la lea ua iai nei, ua taitaifono le afioga ia Nonu Saleimoa Vaai, faatasi ai ma isi sui fou ua filifilia nei, le afioga Fonoti Perelini Perelini, ma le afioga i le faletua ia Gatoloai Tilianamua Afamasaga.
O le faasilasila mai e le afioga i le Tamaitai Palemia, Fiame Naomi Mataaga o nei tofiga i lana fonotaga ma le autusitala, na momoli ai foi ma lana faamalo faafetai i le taitaifono ua faamavae atu nei, le afioga Lauano Vaosa Epa, e tusa ai foi ma le galuega fita sa faatinoina.
O tofiga nei e ta’itolu tausaga ma toe iloilo.
