O le teutupe a Niu Sa Uelese. Matt Kean lea ua filifilia e le vaega faaupufai a le Liberal e avea ma ona sui ta’ita’i. Fai mai e le’i iai se isi sui na to’alua ai le faiga filifiliga mo lea tofiga e ui sa iai faipule sa faailo i le vaiaso talu ai lo latou fia tauva i le tofi. 

Na avanoa le nofoa lea ina ua faamavae lē sa umia le tofi o Stuart Ayres, ina ua feta’ua’ina lona aofia i le faiga filifiliga mo le tofia o John Barilaro i le avanoa tau fefaataua’iga i Amerika e pei ona lipotia atu muamua i talafou. 

O le aso ananafi na toe amata ai fonotaga a le Palemene ae tele su’esu’ega o loo feagai nei ma le komiti a le Palemene e aofia ai nisi sa tulai mai i tofiga maualuluga o le malo ma le setete. 

Fai mai Saina o le a faaumiumi pea ana faata’ita’iga faamiliteli e lata ane ia Taiwan lea ua faalavelavea ai auaunaga o feoa’iga i vaa ma le ea ona o popolega i le saogalemu. 

O le folafolaga a Saina ua atili siitia ai popolega i se vevesi e ono tula’i mai i le va o atunuu e lua, na amata mai i le asiasiga mai a le Fofoga Fetalai o le maota o le malo o Amerika Nancy Pelosi i Taiwan.  

O faata’ita’iga a Saina o loo faia e aofia ai faata’ita’iga faasaga i vaamaulu ma isi meatau. O le 1949 i le mae’a ai o se vevesi i totonu lava o le lotoifale o atunuu e lua na vaeluaina ai ae finau pea Saina o Taiwan o lona teritori. O loo lē amanaia foi e Saina nisi o valaau e pei foi ona aofia ai le valaau a Ausetalia te tauala i le minisita o le va i fafo ina ia faafilemu lea vaipaoa ma e lē mailoa poo afea o le a taofia ai ana faata’ita’iga.