I le savalia ai nei o le ono tausaga talu ona filifilia le afioga Luafalealo Lilo Mikaele Tofete o se tasi o Faamasino o le Faamasinoga o Fanua ma Suafa a Samoa, o le Aso Faraile na te’a nei na faatauto ai lea tamalii e tauaveina tiute ma galuega o se tasi o Pelesetene lagolago mo lea faamasinoga tāua a le atunuu.
O Tesema o le tausaga e 2019 na avea ai ma Faamasino o lea faamasinoga ma tautua ai se’ia oo ina siitia lona tulaga e avea ma Pelesetene lagolago.
O le afioga Luafalealo e tele tausaga o galue faafaia’oga i le malo ae sa filifilia e le Komisi o galuega a le faamasinoga e avea ma Faamasino faatasi ai ma isi tamalii e to’aono sa faatauto i le aso 23 o Tesema o le tausaga e 2019.
O le sauniga na faatauto ai le Pelesetene lagolago fou sa faia i le maota faamasino i Mulinuu i luma o le Pelesetene ma le Sui Pelesetene faapea le mamalu o lea faamasinoga aemaise sa auai ma tauaiga o le afioga i le Pelesetene lagolago ua seei nei e tauave lea tofiga maualuga o le Faamasinoga o Fanua ma Suafa a Samoa.
