Ua tapua’ia ai nei e le pulega o le Lakapi Samoa le tula’i mai o se tasi o tama’ita’i o Samoa sa soifua a’e i Niu Sila, le afioga Fuimaono Bella Milo, ua tofia e avea ma faia’oga ulu o le aulakapi a tama’ita’i o le atunuu le Manusina.
Ua 18 tausaga o auai Fuimaono Bella Milo i le taaloga lakapi na amata ina ua faato’ā 19 tausaga o lona soifua.
Sa filifilia i le ‘au sefululima a le Manusina faapea lana aulakapi ta’ito’afitu, ma o le tausaga e 2024 sa filifilia ai o se tasi o faia’oga lagolago o le Manusina.
Ua faailoa e le pulega o le Lakapi Samoa o se mitamitaga lea i le tula’i mai o lea alo tama’ita’i o le atunuu o le a finauina se tulaga maualuga e oo iai le taumafaiga a le Manusina i taaloga faavaomalo.
O Fuimaono Bella Milo e mai afio’aga o Salani Falealili ma Solosolo.
O le taimi nei o loo faamautū o ia i Hong Kong i Saina ma o loo avea ai ma faia’oga o le kalapu lakapi a tama’ita’i o le Valley.
