Ua lagona e le Palemia le faanoanoa i le faai’uga a le Faamasinoga o Faigāpalota ua faalēaogā ai le filifilia o le faipule o Falealili 1 le afioga Toelupe Maoiautele Poumulinuku Onesemo, ona o le lima taumatau o le Palemia ma le faigāmalo.
Ae ua faailoa e le ta’ita’i o le malo i sona finagalo i le feiloa’iga ma le vasega o tusitala ma le aufaasalalau e lē faatau matatao i le finagalo o le faamasinoga o lana lea pitolaau.
O le Aso Lua o le vaiaso nei na aumai ai le faai’uga o le tagi tau palota a lea itumalo ma e tasi le moliaga o le faia o faiga faaālatua poo le bribery ua faamaonia faasaga i le sui sa avea ma faipule o Falealili 1.
O le māfua’aga lea o le i’uga a le Faamasinoga o Faigāpalota e faalēaogā le tofi faipule ma soloia le nofoa o lea itumalo.
Faaalia e le Palemia susuga Laaulialemalietoa Leuatea Polataiavao Fosi, o loo toesea ma le atunuu le afioga i le Sui Palemia i ni fonotaga faalemalo.
O faai’uga a le faamasinoga o palota i tagi o moliaga o faiga faaālatua e māfua i tapenaga o le palota tele ia Aokuso o le tausaga ua mavae, e to’alua minisita o le Kpeneta ua faamaonia ai o la moliaga, o lē sa avea ma Minisita o le Matāgaluega o Puna’oa Faalenatura ma Si’osi’omaga, ma le Minisita o Galuega Tetele a le malo.
E 10 tausaga e lē mafai ai ona toe tauva tofi o itumalo i le Palemene e faamaonia ni tuua’iga o faiga faaālatua i le Faamasinoga o Faigāpalota.
