Ua toe faalēaogāina e Niu Sila se poloketi sa fuafua e fausia ai se malae vaalele i Toelau ae ua lipotia ua alu le 3 miliona Niu Sila i le design o sea fuafuaga.
Ua faailoa i lipoti a le RNZ faamatalaga mai se sooupu a le Matāgaluega o le Va i Fafo ma fefaataua’iga ua faailoa ai ua mae’a faailoa atu lea fuafuaga i le faigāmalo a Toelau.
O Toelau e faaaogā lava vaa e faimalaga ane ai tagata mai Samoa aga’i i Toelau ma e ta’ilua vaiaso ma faia malaga mo se umi e 24-36 itula.
Faailoa la e le Matāgaluega o le Va i Fafo a Niu Sila, o le taugatā o le poloketi ma faigatā tau le si’osi’omaga o lu’itau ia ae latou te maitauina o se auaunaga faapea ua leva ona tagisia e tagata Toelau.
O se finagalo faaalia o se tasi o sui o le Atafu Tokelau Community i Porirua sa faatalanoa e le RNZ ua ia ta’ua ai ua fiafia ua faamuta le galuega ona e lē taitai lava le fanua mo se malae vaalele ae iai foi aafiaga tau le si’osi’omaga.
Ta’ua foi e lelei ona faaaogā le tupe i se isi faiga e aogā e pei o le faaleleia o vaa o loo faaaogāina i le taimi nei mo femalagaa’iga.
Fai mai le sooupu a le Leipa i matāupu tau le Pasefika, Carmel Sepuloni i lea lipoti, e faanoanoa i lenei tala e ui e lē o manino tonu mai le atoaga o lea faai’uga ma le faamuta o sea poloketi tāua.
Puna o Faamatalaga: https://www.rnz.co.nz/international/pacific-news/584763/tokelau-airport-project-scrapped-despite-multi-million-dollar-design
