Ua toe tauaofia i le Aso Lua o lenei vaiaso mo le faaauauina o taualumaga a le Fono Aoao Faitulafono i lenei tausaga fou ana fonotaga masani sa tolopo mai i le masina faaiu o lena tausaga ua mavae atu.

O le tala faaopoopo o le tupe muamua e lagolago atili ai le tala autu o le tupe mai ia Iulai o le tausaga na tea nei e oo i le faaiuga o le masina o Iuni o le tausaga nei, o le a soalaupule ma talanoaina e sui usufono mamalu o le Palemene ia latou galuega amata o lenei tausaga.

O le tauaofiaga faaauau a le fono aoao o le a faataatia ai foi nisi o lipoti a komiti faapalemene faapea lipoti a nisi o matagaluega ma faalapotopotoga a le Malo.