Ua faatonuina e le faamasinoga le kalapu tapolo e toe totogi le $15,000 i lē sa faatonusili peitai na faamalolo ona o le lē faia o lona tui o le Koviti.
O Benjamin Harwood sa vaaia le kalapu seia oo mai i le aso mulimuli o Tesema o le 2021.
O le faamalolo o ia ona o le tui o le Koviti na sulu ai loa i le Employment Relations Authority ma lana finau e lei sa’o le faamalolo o ia mai lana galuega.
Na finau ai ia toe totogi mai ona totogi e lei maua ona o le faaiuga ua iai nei, atoa ai ma lagona tiga na aafia ai lona mafaufau aemaise o lona aiga.
E ui i le finau mai a le itu tali o lea lava sa faia faatalanoaga ma fonotaga ae e lei oo i le faaiuga mulimuli o le faamalolo o Harwood, ae i le silasila a le faamasinoga e lei lava le piriota sa tuuina atu e tatau ai ona faia uma ona tui e lua atoa ai e lei vaai le pulega i se isi lava auala e mafai ai ona fetuunai le galuega ina ia maua ai pea sona avanoa.
O le iuga a le faamasinoga ia toe totogi e le kalapu le $15,000 mo lagona maasiasi ua oo ia Harwood ona o le faaiuga a le kalapu atoa ai ma totogi o le lua masina.
