Ua toe taunuu ane i laufanua o Brisbane le tama aoga mai le Iunivesite o Kuiniselani lea na tigaina lona gasegase i Taiwan ina ua lipotia le aafia i le rat poison e talitonuina o le ituaiga o le super warfarin.
O le alii talavou o Alex Shorey na faavave atu i le falemai o Princess Alexandra lea ua togafitia ai ae sa agai i Taiwan o se exchange student ae aumai faapitoa ai i le medevac jet i le po anapo ma auina loa mo togafitiga.
Sa taofia i le falemai i Taipei ina ua tigaina ona aafiaga mai le poison lea ae lē o manino pe faapefea ona ia foloina se vaega o lea vailaau oona.
O le aso 18 o Aperila na ta’ua na matuai tigaina ai ma faifaitetele aafiaga i le lima aso talu ai.
E masalomia o ni taumafa sa ia faatau i maketi i le auala lea e aafia ai.
Na ta’ua e si ona tina o Julie i le 9News lona agaga faafetai ma le faamaulalo i tagata na o latou saosaoina se vaegatupe e 200 afe e toe faafoi ane ai si ana tama i Brisbane mo le faia o togafitiga.
