Poo le isi aso i le lua aso e toe tau faafoi ai faigamalaga a vaalele a le Ea Niu Sila, ona o le tele o faigamalaga ma pasese ua aafia e mafua mai i suiga o le tau na iai ananafi.
E 93 faigamalaga a le kamupani vaalele na lei faataunuuina ananafi ona o le malolosi tele o savili, ma e tusa lea ma le 12,000 pasese na aafia ai.
E le o faigofie ai le toe tau fetuunai ona o lea ua tele ina tutumu uma faigamalaga a vaa ua mae’a faatulaga i le vaiaso mulimuli o le tuuaga o aoga o loo iai.
Mai le sui o le pulega i le taeao nei, o lea o loo taumafai e toe fetuunai tagata aafia i isi faigamalaga peitai e ono iai lava se vaega e faigata ona toe maua se isi vaa e fetaui ma i latou ma o le a mafai ona taofi pasese na totogi o ni credits.
E oo mai i le taeao nei e le o iloga lava ona iai i se tulaga mautinoa Ueligitone ona o le malolosi tele o savili, ma e ono faaauau ona taofia faigamalaga a vaalele ua faatulaga e afea Ueligitone.
E ese mai i faigamalaga a vaalele, e faapea foi le tele o faigamalaga a vaa feoai i le sami lea ua taofia lē tumau.
