A o tālia ai le faaiuga o le fono o le Atoa o Samoa ma ni maliega i ni mataupu o loo faatalanoa i le va o le Kovana Sili o Amerika Samoa ma lana usugafono faapea le tamaitai Palemia o Samoa Tutoatasi ma lana usugafono, o le aso muamua o le fonotaga o loo usuia i le faletalimalo o le Taumeasina Island Reasort, ua faailoa ai e le Faatonu o le Matagaluega o Faatoaga a le Teritori, le toe tatala ai o le tapu o aano o manufasi e pei o povi mo le faaulufaleina atu i Tutuila ma Manu’a.
E le gata ina toe tatala atu aano o manufasi mai Samoa ae ua toe tatala ai foi ona faaulufale atu pisupo ma sosisi e gaosia i Samoa, faapea ma moa ma fuamoa.
Ua faaalia e se molimau faatuatuaina o le toe tatala ai o nei oloa tau taumafa ona ua faamalieina sui o le faigamalo i Sasa’e i le tulaga o loo faafoe ai ma vaaia lafumanu papalagi faapea atina’e moa mo le maua o fuamoa i totonu o le tatou atunuu.
Mo le silafia o le mae’a o le faalavelave matautia i Amerika ia Setema o le tausaga e 2001 na faia ai le tapu lenei i le faamatalaga o se faaiuga a le Malo tele o Amerika i le vaega o taumafa, e mafua ona e le saogalemu nofoaga i Samoa e tapena ai aano o manufasi aemaise le povi.
Mai lea taimi umi ua savalia nei le 19 tausaga, o le tausaga e 2016 i talanoaga i le va o Samoa e lua na toe iloilo ai lenei tapu ma fuafua ai o le a toe faaulufale aano o manufasi mai Samoa i ni aiaiga, peitai o le tausaga e 2020 na fuafua ai loa e faatino ae na toe faataatia ma galoma ai lava, seia oo mai i le tausaga e 2022 i talanoaga lava faavaomalo a Samoa e lua o lea ua matala ia sega lea mataupu ma ua toe tatala.
O faaaloaloga faaleaganuu a le Malo o Samoa i le mae’a ona tatala le fono o le Atoa o Samoa, na molimauina ai i faaaloaloga o sua ma le faaoso mo le aumalaga mai Amerika Samoa, e 10 manu papalagi o pusa sosisi e gaosia i Samoa Tutoatasi, ma cooler i’a sa saunia e le Malo Tutoatasi.
E iai le talitonuga o le tasi lea o uta tele a le Lady Naomi mo Amerika Samoa i le faaiuga o lenei vaiaso.
I le aso muamua lava o lenei fonotaga o lea foi ua faailoa e le usugafono mai Tutuila ma Manu’a, o le faaiuga o le masina fou o Novema e faamuta ai le toe faia o aiaiga mo tagata malaga mai Samoa i le aiaiga ua ta’ua o le Talofa Pass.
O se aiaiga tau femalagaa’iga sa lesitala ai tagata o isi atunuu e ulufale atu i le teritori talu ona pipisi le faamai Koviti-19. O se aiaiga na tele ai ni faasea ona o tupe e faaalu ai a tagata malaga faapea ma gaioiga e manaomia ona faatino.
