Ua toe taliu mai le minisita o le va i fafo a Niu Sila o Nanaia Mahuta mai sana malaga i Saina ma ua ia faailoa o le mafutaga lea e matuai tāua tele ma e faigata foi.
O le malaga a le minisita sa amata faatulaga atu foi ma se malaga e ono agai ai le Palemia Chris Hipkins i Saina i le tausaga nei lava e pei ona faailoa i lipoti a le One News.
O Saina le paaga aupito tele a Niu Sila o loo iai i tulaga tau fefaatauaiga a o isi ana paaga i tulaga tau puipuiga e aofia ai Ausetalia, Amerika ma le United Kingdom.
E ta’ua i le lipoti o le feau o loo tuuina mai e Saina o loo malosi le mafutaga ma Niu Sila ma o loo latou faaaloalogia foi le tulaga o lea sootaga faauo ma Niu Sila ma faaauau pea ona naunau e faaauau avanoa e faaleleia atili ai tulaga tau fefaatauaiga ma galulue faatasi mo le faaleleia o le tamaoaiga.
