Ua toe taunuu manuia i Niu Sila le isi vaega o le aumalaga a le Manawanui lea ua magoto i Samoa, ua faamoemoe e taunuu mai i le asō isi.
E to’a 75 i latou sa i luga o le vaa a le navy a Niu Sila le Manawanui, ma o le 72 lea na toe taliu mai ananafi ma api ai i le nofoaga autū a le ami i Whenuapai anapo ma le faamoemoe e faato’ā o i tua i aiga i le aoauli o le asō.
O le isi to’atolu o lea faato’ā omai i le asō e tusa ma faamaoniga mai le ami.
O le saunoaga mai le Palemia o Niu Sila ananafi, Christopher Luxon, o lea ua aga’i le malo i su’esu’ega ma galuega faamamā mo le siosiomaga ona o aafiaga ua iai nei ona o le vaa ua magoto ma o le aso foi ananafi lea na alu ai le isi vaalele a le ami a Niu Sila o loo o ai le aufaigaluega faapea meafaigaluega mo galuega faamamā.
I tulaga tau tupe, saunoa le minisita o tupe, Nicola Willis, e lē o iai se inisiua i luga o le vaa $100 miliona ua magoto ma o loo vaavaai nei poo le ā le isi sitepu.
O le ulua’i taimi lenei ua alu atu ai se isi vaa a le ami a Niu Sila faapea talu mai taimi o le taua lona lua a le lalolagi.
Puna o Faamatalaga: HMNZS Manawanui sinking: $100m Navy ship was not fully insured; only third-party insurance to cover ‘some’ of clean-up – NZ Herald
Manawanui sinking: Crew and passengers returning to New Zealand | RNZ News
