Ua toe tali mai le taitai o le National i le mataupu e pei ona lipotia atu i talafou i le Aso Gafua, e faatatau i ana faamatalaga sa faia, e ta’ua ai faletaavale i Aukilani i Saute.
O le aso ananafi ua faailoa ai e le Herald se faamatalaga a Luxon e faapea e faamalie i soo se tagata na aafia i sana faamatalaga.
E tele taitai o komiuniti aemaise o le faipule o Magele, Aupito William Sio o le minisita foi o tagata Pasefika sa faailoa finagalo i le mataupu lenei ma ta’ua o ni faamatalaga le manuia sa saunoa ai Luxon.
Sa faailoa foi la e le taitai o le National e lei iai sona agaga e lē faaaloalo ia South Auckland ma sa faapatino lana tautalaga i le mataupu sa talanoaina ma ua ia faatoese ai i soo se tagata sa afaina i ana faamatalaga.
Na ia ta’ua foi i lea faatalanoaga o ia sa umi se taimi sa faaalu i Aukilani i Saute sa faigaluega ai i lona itumalo o Botany e tuaoi ma Otara ma afai sa fesiligia o ia i se mataupu e faatatau i soligatulafono ma luitau, ona tatau lea ona ia tautala sa’o i ia tulaga pei ona ia tali ai.
