Ua toe tali mai le alii o Jarome Luai ma Brian Too i nisi o faamatalaga sa faia faasaga ia i laua ma faai’uga ua faia e taaalo ai mo Samoa i le Ipu o le lalolagi ma ta’ua ai ua avea lea ma mafuaaga ua faaitiitia ai lo la naunau i le ‘au a Niu Sa Uelese. O lipoti a le Alaata7 i le vaiaso nei ua faailoa ai e Luai o ia faamatalaga e fia ‘ata ai ma faavalevalea. 

Fai mai Luai i le faatalanoaga i le AAP e faigata ona faamasinoina se tulaga naunau o se tagata, ma e fai a si mālie o nei faamatalaga. Ta’ua e Luai o ia soo se jersey na te ofuina e matuā telē lona uiga ia te ia ma o loo tusia ai foi ma lona faai’u, e lē iloa la pe faapefea ona faamasino lea tulaga.  

Na ta’ua foi e le alii o Brian Too i le lipoti lea e latou te faatāuaina le jersey e tusa lava pe mo le Panthers poo le Blues foi ma e soo se jersey e ofuina e faafetaia le avanoa ua maua ma e tuu atoa foi iai le fatu ma le agaga. Fai mai i laua ia e mitamita i o la itu Polenisia aemaise o le olaga na ola ane ai i komiuniti Samoa, e moni o loo i Ausetalia i le taimi nei ae o le tulaga lea o ala o le soifuaga.