Ua toe suia le faaiuga a se tasi o maketi i Sini i ana fuafuaga sa faalauiloa e faasā ai tagata e fai a latou stalls i le maketi ona faatau ni oloa e faaautu ia Ausetalia.

Ua faailoa e le 9News i le aso ananafi o le ‘au faatau oloa i le The Rocks Market lea e lata i le nofoaga mo tulisi i le Circular Quay na faailoa iai e sui o le ofisa o le malo lea latou te faatautaia nofoaga ia e faapea, e le o toe faatagaina ona faatau ni oloa e iai sootaga ia Ausetalia faataitaiga o oloa e pei o kagalu ma koala pea.

Fai mai sa faailoa i le au fai stall e tatau ona toe talosaga mo ni o latou avanoa i lea maketi a e silia ma le 50 talosaga ua teena.

Peitai la i se faatalanoaga a se tasi o minisita ma o se faipule foi i Niu Sa Uelese o David Elliot i le leitio 2GB ua ia ta’ua ai o le faasā o le tulaga lea i oloa tau Ausetalia o se faiga le talafeagai ma o le a lē oo ona faatino.

Fai mai Elliot ua mae’a ona ia talanoa i le minisita o loo feagai ma le auaunaga lea ma faailoa foi le mataupu i le premier ma o lea la ua toe suia ai lea faaiuga sa faia muamua.

Ua maua i nisi lipoti le toe maua o avanoa o nai fai stalls ia sa teena e toe faafou ai a latou laisene e faaauau ai a latou auaunaga ua autausagā i le aai o Sini.